Opinión

Comunicación

02/10/2020

A cultura en alerta roya

Marco Negredo Sebastián

Por Marco Negredo Sebastián

Secretaire de Cultura, Luenga e Identidá Nazional de CHA

A Covid-19 nos ha pillau a toda la chen de imprevisto y manimenos a ostelería alto u baxo treballa, o sector industrial rezibe empentóns ta que tire t'adebán, sanidat y educazión son consideradas como prioritarias, ezt.

Sindembargo a cultura rezibe pocas aduyas pero muitas zancalletas. Menos mal a los Fundos de Codesión conzedius por a Direzión Cheneral  d'Ordenazión d'o Territorio que ha puesto trayer cultura a diferéns lugars Aragoneses porque as salas de conziertos son trancadas dende marzo, muitas dificultaz ta grabar un filme, o mundo d'o teyatro agoniza, a cultura ye en alerta roya. Os festivals culturals d'as nuestras redoladas s'han suspendiu, como las fiestas u birollas. En retes sozials veyébanos con tristura como los organizadors de eventos como lo Carrasca, Poborina Folk, Gaire, Tamborilé, fiestas de recreazión istorica  y atros muitos festivals, charran con nostalchia d'as suyas edizións d'añadas zagueras como a ilusión, u asperanza, de que en o 2021 podamos tornar a implar as carreras d'ixos lugars.

Tanimientres, os treballadors d'o espectaclo, y mosicos y profesionals d'a sonorizazión, piden, entre atras cosas, qu'as instituzións y alministrazións publicas reconoxcan a lo sector como "especialment prechudicato" por o coronavirus, por a cancelazión d'eventos y control d'aforos, de vez que piden de maniera urchén creyar una mesa sectorial qu'atienda las suyas demandas y en a que sigan os zinco ministerios implicaus en a industria (Treballo, Cultura, Seguridat Sozial, Turismo y Fazienda). 

Ya zentrado-nos en Aragón, y más que más en o meyo rural, ye preziso, baxo lo mío entender, creyar dende o Gubierno d'Aragón una estructura cultural  que tenga como núcleo d'azión en o rete todas las comarcas d'Aragón, fazilitando a organizazión interterritorial y a difusión d'espectaclos aragoneses. Amás, cal revitalizar  a cultura alazetal (concursos, becas, cursos de disziplinas artisticas, teyatro aficionau), dende a dinamización cultural. Fomentar que as presonas d'os pueblos faigan cultura y no sólo que la veigan y qu'os responsables d'a dinamizazión motiven a fer cultura en os lugars y no sólo que traigan cultura. Sólo que asinas a cultura dixará d'estar en alerta roya.

Galería